Qo'noS QonoS - Ausgabe #16, April 2001

Siehe auch Hauptartikel Qo'noS QonoS.

Der folgende Text wurde von der Homepage des KLI übernommen und hier zur Archivierung und späteren Bezugnahme angezeigt. Diese Wiki besitzt keinerlei Rechte an dem Inhalt.

bep lengwI'

qonta' ghunchu'wI'
(geschrieben von Alan Anderson)

pIj leng qorDu'wIj. roD yav HemeyDaq jIchIj. maHvaD qub muD Duj leng. February muchmey DIbejmeH New York City wIghoS. ngaj lengmaj wIneHmo' mapuv. US Airways wIlIgh. QaQHa'mo' wanI' jIbep.

lutwIj vIDelpa' wa' ngoD ram vIQIjnIS: malengpa' rIQ be'nalwI' ngIb. QIt yItlaH. Qutlh'eghmeH naQmey wuvnIS.

jeymaj wISuqDI', wa'maH Soch vatlh rep Indianapolisvo' matlheD net nab. vaj Duj yotlhDaq ma'eq. wa'maH jav vatlh rep mapaw. lojmIt beq vIyu': «rIghmo' be'nalwI' 'eqlaHneS'a' yongchoHghachmaj?» Seng wa'DIch wItu': machqu'mo' Duj, choghvat'och lo'lu'be'. letlhDaq maghIrnIS; ghIq HurDaq mayItnIS; ghIq choghvat wItoSnIS. nuvqengwI' wIlo' wIneHchugh chaw'lu'. Do'Ha' Hop; tIq chuq mayItnIStaHvIS. vaj letlh Sum wIlo' 'e' wIv be'nalwI'. matIjchoHDI', tIjwI' wa'DIch ghaH.

loQ paSlaw' Duj wIlIghnISbogh. NYC Indianapolis je joj ghoS Dujvam. NYCvo' puvchoHDI' paSbej, 'ej leng poH ngajmoHlaHchu'be'. qay'qu'be'. SengHom neH 'oH. loQ loSqang lIghrupwI'pu'. tagha' Saq Duj wIneHbogh. tenHa' raQpo'pu' 'e' cha' Qorwagh tIn. DujDaq tepmaj qenglu'. tugh matenlaH 'e' wIpIH.

maloStaH. qaS tlheDmeH rep. pagh maq lojmIt beq. maloStaH. tagha' wanI' Huj wIghoj: tlhoy 'ughmo' Duj puvlaHbe'. law' raQpo'pu' 'ej DujvaD nIn 'Iq lunobpu' leHwI'pu'. matlheDlaHpa' 'op nIn lelnISlu'. Sengvam cha'DIch wISIQ 'ej maloSqa'taH.

tugh paw Duj cha'DIch. tenHa' raQpo'pu'. nab chu' 'ogh beq: Dujvetlh'e' wIlIghlaH. Duj chu' meH 'el yaSpu'. Duj chu' lunuDchoH leHwI'. Duj wa'DIchvo' Duj chu'Daq tepmaj Qaylu'. maloStaHqu'. Duj wa'DIch lutIj raQpo' ghom pIm. chaH puS law' maH puS puS vaj Duj 'ugh lulo'laH chaH'e'. rutlh nuDchu'taH wa' leHwI'. tagha' yonlaw' Hoch... 'ach maloStaH.

wa'maH chorgh vatlh rep jatlh lojmIt beq: «wej tIjmeH chaw' wIHevpu'.» meq QIjbe'. wejpuH. Seng tu'lu'be'chugh, ngugh NYCDaq maSaqpu'. cha'maH tup pIq jatlhqa': «DaH SutIjchoHlaH.» QIt letlh maghIr. QIt DujDaq mayIt. mamImqu'lu'mo' 'ej loQ SIStaHmo' maberghqu'. QIt choghvat wItoS. be'nalwI' QutlhmeH naQmey vItlhap 'ej teppa'HomDaq vIlan. DaH qaS Seng wejDIch: wa' quS DoQlaw' cha' nuv. QIt wanI' yajchoHlu'. tIjmeH chaw' laDHa'pu' wa'. laDHa'pu' je lojmIt 'avwI'. Duj muj yongta' ghaH. vaj mejnIS.

tagha' -- tagha'! -- mapuvchoH. wa'maH Hut vatlh rep chalDaq maH. nom wIleng. cha'maH vatlh rep wejmaH tup maSaq. 'ach vergh wIghoSlaHbe' jay'! Hemaj lubot Duj law'. maloSnISqa'. qaStaHvIS wa'maH vagh tup mavIHbe'. cha'maH wa' vatlh rep verghpu' Duj. choghvat qemlu'. Duj lojmIt poSmoHlu'. maHaw'. yavDaq maghIr. mayIt. letlh wItoS. choghvat'och wIvegh. matlhab! Do'Ha' mapaSqu'. cha' rep ret wIpIHlu'.

qaSpu'DI' cha'maH tup tepmaj wISuqqa'ta' 'ej me'wI' wISamta' 'ej me'wI' juH wIghoSlI'. maSuchtaHvIS QaQ poH. muchmey DIbej. Qe'meyDaq maSop. QoQ wIlIngmeH 'Inmey maHpInmey je DIlo'. 'ach poH QaQ vIDel vIneHbe'. jIbepmeH QonoSvam vIqon.

lengwI' QonoS

qonta' Holtej
(geschrieben von d'Armond Speers)

tlhoy jIleng. leng «-be'» 'ach jIlengqu' jIH. qatlh jIleng? jIvummeH. jIleng 'e' poQ pInwI'. lengtaHghach tIvbe'lu' 'e' 'ollaH pIj lengbogh nuv. tep chIllu', paSlu'chugh tlheD muD Duj, 'up Soj, qaStaHvIS poH nI' qorDu' leghbe'lu'. wejpuH.

HIyajHa'Qo', jIlengtaHvIS qabbe' Hoch. Daq Daj vISuchlaH; jIlengbe'chugh vISuchlaHbe'. qen Turin, 'Italya' vISuch. HuD noy (alps) DungDaq puj muD DujwIj. 'IH! Oslo, noregh vISuch, 'ej lurDechDaj vIpab: wep le' vIje'. wep chenmoHmeH Ha'DIbaH veD lo'lu'. (waghqu'). BelgiumDaq be'nalwI'vaD lace vIje'. juHwIjDaq jISaHbe'taHvIS Quchbe' qorDu'wIj, 'ach vIcheghDI' nobmey vIqem 'e' lutIv chaH.

'ach jIHvaD, latlh tlhIngan Hol jatlhwI' vIqIH vIneH. LondonDaq, TorontoDaq, DoyIchlanDaq, latlh vengDaq je tlhIngan Hol jatlhwI' vIqIHpu'. DoyIchlanDaq nI'taQ vIghom ('ej Qo'noS QonoSvaD qepmaj Del). qaStaHvIS rep puS majatlh, 'ej tlhoS tlhIngan Hol neH wIlo'. Dunqu'! qub 'ebvam. meqvammo' qep'a'vam vIloStaHvIS jaj vItogh. (vIqontaHvIS, ratlh wa'vatlh jaj!) HIja', jISaH. qaSchugh ghu'vam, jIbelbej: latlh vIqIH vIneH, 'ej tlhIngan Hol neH wIjatlh jIH, latlh je. latlh Hol jatlhlaH latlh nuv, 'ach Holvetlh vIjatlhbe'. latlh Hol vIjatlh, 'ach Holvetlh jatlhbe' latlh nuv. maQummeH, wa' Hol neH jatlhlaH. jInajlaH, qar'a'?

ben law' MexicoDaq jIleng. muQaH lengwI' boQ 'e' vIpoQ. DIvI' Hol jatlhbe' ghaH, 'ej Mexico Hol vIjatlhbe'. 'ach vIraS Hol wIjatlh ghaH jIH je. jIpo'be', 'ach maQummeH yap SovwIj. Dun wanI'vam! tlhIngan Hol vIjatlhtaHvIS qaSqa' ghu'vam vIneH. tlhoy jIleng. 'ach lengvam vItIvbej.

Siehe auch

Weblinks

Kategorie: KLI    Letzte Bearbeitung: 24 Aug 2015, durch MarcZankl    Erstellt: 24 Aug 2015 durch MarcZankl


 
Das Klingonisch-Wiki ist ein Projekt des Deutschen Klingonisch-Instituts. Alle inhalte werden zu edukativen Zwecken dargestellt Zwecks Förderung der klingonischen Sprache und dienen zur Unterstützung in Kombination mt den bekannten offiziellen Werken zum Thema. Die Begriffe Star Trek™ und Klingon™ sind Eigentum von CBS Studios Inc. und Paramount Pictures.