Verlinke zu Filmen und Serien ganz einfach mit dem Kürzel ST1, ST2 usw. und TOS, TNG, DSN, VOY, ENT, DSC - z.B. so: %DSC%

Qo'noS QonoS - Ausgabe #28, Dezember 2003

Siehe auch Hauptartikel MOVED TO... Qo'noS QonoS.

Der folgende Text wurde von der Homepage des KLI übernommen und hier zur Archivierung und späteren Bezugnahme angezeigt. Diese Wiki besitzt keinerlei Rechte an dem Inhalt.

paq vIchov: Codex Seraphinianus

qonta' taD
(geschrieben von Tad Stauffer)

Codex Seraphinianus

qen paq vISuq. paqvam qonmo' Luigi Serafini (Italyngan), 'oHvaD Codex Seraphinianus pongpu' je ghaH. loSvatlh nav ngaS, 'ej tera' DIS 1981 chenpu' paq.

loQ mem rur paqvam; chaq DaDelmeH mu' EncyclopediaHom Dalo'. 'a chay' le' paqvam'e'? Hoch paq Dal Daj paqvam Dal qetlh - qatlh? qatlh paq vIDIlmeH 'ej Italyvo' HIjlu'meH chIch Huch 'Iqqu' vIpolHa'law'ta'? motlhbe'qu'chu'mo' paqvam'e' vIghajchoH. latlh qo' mem 'oH.

paqvamDaq qo' jum Del Serafini. (ngebba'bogh) qo'vam QeDmey Del paq bID wa'DIch; tI, Ha'DIbaH Sar, latlh je QIjlaw'. qo'vam ghot, tIgh, Qujmey, Seghmey, pIqaDHey pat je Dellaw' bID cha'DIch.

toH, qatlh {-law'} vIlo'? qo'vam DelmeH, pIqaDHeyDaj lo' paq. pIqaDHeyvam, Holvam je 'oghta' Serafini. vaj Italy Hol lo'be' paq. paq'e' DalaDmeH, HolHey pat 'oghta'bogh Serafini DaghojnIS. 'ach tera' Hol 'oHbe'law'. Serafini yabDaq chenlaw' Holvam; 'ej Hol yajmeH mIw peghlaw'taH ghaH. chaq Holna' 'oS mu'meyHeyvam, 'ej latlh De'na' luSo'taH bIH. chaq Dap neH bIH 'ej pagh 'anglaH mu'meyqoq. wej Sovlu'bej.

Bild aus dem Internet-Archiv

Hujlaw' qo'vam DelmeH Hol pat'e', 'ej taQbej ghotpu''e', qo'chaj'e' je muchbogh paq. loQ tera' rur qo' Delbogh. 'a rurHa' je. 'op Ha'DIbaH Daghov, 'a rapqu'be'bej.

Bild aus dem Internet-Archiv

muvuQbej Codex Seraphinianus. 'IHqu' navmey. muqaDbeHlaw' je navmey. muvuQchoHpu' HolQeD; tlhIngan Hol vIghojba'pu'. vaj mupIlmoH HolHeyvam je. latlh tlhIngan Hol jatlhwI' je vuQlaw'pu' paqvam. Serafini Hol lumughqu'be'lu'pu', 'a paq navmey toghbogh mI' pat'e' pojta' 'Iwvan. mI' wej pat lo' no' tlhIngan Hol net Sov. mI' cha'maH wa' pat lo' paq navmey toghbogh mI' pat'e' 'e' tu' 'Iwvan. http://www.math.bas.bg/~iad/serafin.htmlDaq De'Daj gherbogh ghaH DalaDlaH. yapDI' poHwIj, Serafini Hol vIpoj 'e' vInID je.

chaq qItbe' Codex Seraphinianus Hol mughmeH Qu'. chaq peghtaH navDaj. chaq chatlh neH 'oH. 'ach 'eylaH chatlh je.

lammo' chep tayqeq

qonta' Qov
(geschrieben von Robyn Stewart)

taychoHpa' Hoch nughmey, Satlh lu'ogh. chay' wo' chavmey Dun qaSchoHlaw' lam ruQbogh wIjwI'? tayqeq 'ItlhvaD potlhtaH'a' wIjwI'? tayqeq SachchoHghach ngermey vI'ang 'ej DaHjaj Satlh qechmey vInuD.

Satlh lo'be'chugh nugh, wam Hoch qoj tI lI' nej. wa' mIchDaq law'Ha'choHDI' gheD, lengqa' nuvpu'. vaj lengtaH. juH ru' neH chenmoH. Dochmey 'ugh vI'be'. wamwI' boSwI' je chaH lengwI'pu'vetlh'e'. puS chaH: tInchoHchugh tuqmey nom loj Ha'DIbaHmey.

yavDaq pumpu'DI' naH, tagh tI chu' ghaytan 'e' tu' wamwI'. SaH'a'? DeHpa' naH mejta' lengwI'. naH Sop lengwI' 'e' maS. 'a pochchoHba' vay'. chaq bong pochchoH.

chaq pochchoHmo' lengwI' ghur Soj, vaj machchoH lengmeH SepDaj. pIj mIch rap Suchmo' SatlhDaj lutlh Dub. qulvaD Sormey law' pe'mo' chen yotlh. pIvlaH tI. law'mo' tI ratlh Ha'DIbaH. chaq Ha'DIbaH jon nuvpu'. not lojmo' Soj, lengbe'choH. vaj Satlh lutlhmo' lengbe'choH lengwI' ja' nger wa'DIch.

lengbe'choHmo' Satlh 'ogh lengwI', ja' nger cha'DIch. chepbogh SepDaq Soj law' law' wamwI'pu' law' puS, vaj not lojlaw' Soj. qaStaHvIS poH nI' lengbe' wamwI'pu'. boghmo' puq law', puSchoH jo. 'ovchoH tuq vaj Satlh lo'choH.

pupbe' ngermey. Qapqu'be' taghwI' Du'. pay' lengbe'ba' wamwI'pu'. rut quq Satlh nugh, wambogh nugh je, 'ej wa' retlhDaq taH latlh.

nIv'a' Satlh nugh? chepbej. puq law' je'laHmo' wIjwI', vaj chep 'ej ghur. SaHchugh ngem Ha'DIbaHmey, wamlaH 'ej SaHbe'chugh yoblaH. 'a Soj neH choHbe'moH Satlh. nugh'e' choHmoH. lengbe'choHmo' nuv choH juHmey. ru'be'mo' juHmey HoS chenmoHlaH. Hub'eghchoHlaH. Soj Hal SeHchoHDI' nugh San SeHchoH. nablaH. wIjtaHvIS 'op, nablaH latlhpu'. chen tlham, qun je. vumbe'mo' Hoch 'oghchoH. mangghom je'choHlaH, vaj DuHchoH veS. HachchoH tayqeq.

'oghlaH je lengwI'. chaq Hoch'e' 'oghlaHbogh wIjwI' 'oghlaH wamwI', 'ach vaj Satlh je 'ogh wamwI'. vay' 'oghchugh vay', lo'choH. vaj 'oghtaHchugh wambogh nugh, wIjbogh nugh moj.

'a qaS nuq 'oghtaHchugh wIjbogh nugh? choHtaH Satlh, 'ej potlhqu'be'choHlaw' Satlh. SatlhvaD jo' lo'choHDI' wIjwI' nuv law' je'laH wa' wIjwI'. tayqeq qun 'oH lam tunmoHmeH cham qun'e'. ghopDu' lo' wIjwI'pu' wa'DIch, ghIq lam pe'meH jo' lo'choH. . choHtaH vo'meH mIw: luH wIjwI', ghIq luH wIjwI' Ha'DIbaH. ghIq luH QuQmey. choH je Hap: baS 'etlhHommey moj Sor Hap. tera' puHmey 'ItlhDaq chorghmaH nuv je' wa' wIjwI'.

potlhba' cham, 'ach boQ 'ej boQHa'. tI ghurmeH, ghewmey HoHmeH qoj taSmey 'ogh tejpu' 'ach bIQ watlhHa'moH taSmey. tI yIn ngoq ghun tej. rut Ha'DIbaH yIn ngoq lo'. tI HoSmoH mIw, 'a QobmoH'a'? QoblaH 'e' Har nuv law'. wej wISovchu'. Soj le' 'oghmo' tejpu' 'ej puSchoH wIjwI'pu', puSchoH Seghmey. Sarqu'be'mo' Seghmey, chaq Sang wa' rop. Sep'eghlaHbe' naH law' -- chu'wI' DIlnIS wIjwI'.

'ut Soj. Du'mey cham je DIwuv. Soj lIngmeH laHmaj wIQaw'be'meH, Soj lIngmeH laHmaj wIDubtaHvIS mayepnIS.

Siehe auch

Weblinks

Kategorie: KLI    Letzte Bearbeitung: 08 Apr 2016, durch MarcZankl    Erstellt: 08 Apr 2016 durch MarcZankl




AlanAnderson
Alan Anderson ist ein professioneller Programmierer und Amateur Klingonist ...
PaulClegg
Paul Clegg ist ein Klingonist , der im Jahr 1992 zu lernen begann ...
2010
* Das 17. qep'a' findet statt * Das 9. qepHom Saarbrücken findet ...

Wochentag:
Heute ist buqjaj


starred Zufälliger Artikel


  • Search

Andere Sprachen:

flag_en.png English
flag_de.png Deutsch
flag_nl.png Create New Topic
flag_fr.png Create New Topic

Das Wiki auf Facebook:

 
Klingonisch-Wiki - Lernst du noch oder sprichst du schon?

All text is available under the terms of a Creative Commons License.
Star Trek™, Klingon™ and related names are trademarks of CBS Corporation and Paramount Pictures, and are used under "fair use" guidelines.