Qo'noS QonoS - Issue 14, February 2001

See MOVED TO... Qo'noS QonoS for more information.

The following text has been imported from the KLI's homepage and is displayed here for archiving and future reference. No copyright infringement intended.

Holtej vIqIH

qonta' nI'taQ
(written by Katrin Siewert) (Note: Some words in this text have been replaced by new words we have learned after the text has been published)

'op jar ret, QIn ngeH Holtej, jatlh: «DoyIchlanDaq jIH. bISumchugh, vaj maghomlaH.» ghaHvaD jIjang 'ej maghommeH poH wInab. Cologne mebpa'mey DablI' ghaH 'ej pa' qaS qepmaj wIneH.

not nIteb CologneDaq jIHmo' 'ej vengvetlh vISovchu'be'mo', mutlhej jup vIneH. tlhIngan Hol jatlhlaHbe' ghaH, 'ach DaqwIj vISovbe'chugh, vaj jImobbe' 'e' vIQub. loQ tlhIngan Hol vIjatlhmo' 'ej QaQqu'be'mo' DIvI' Hol laHwIj, jISeyqu'. tlhIngan Hol vIjatlhpu', wa'logh 'e' vInID, 'ach maQapbe'mo', jIbIt. motlh tlhIngan Hol vIghItlh neH.

qaSDI' maghommeH jaj, murI' jupwIj, jatlh «jIrop. qatlhejlaHbe'.» Qu'vatlh! nIteb jIleng vIneHbe', 'ach qubmo' tlhIngan Hol vIjatlhlaHmeH 'eb, jIyoHnIS.

HemeyDaq Dujmey law' tu'lu'mo' 'ej SIbI' mebpa'mey vISamlaHbe'mo', jIpaS. jIpawpa' mejbe' Holtej, 'e' vItul. mebpa'mey vaSDaq jI'elDI' 'op nuvpu' vIleghlaH, 'ach Holtej rur pagh. vISamlaHbe'. Do' tlhIngan Hol mu'ghom vIqem. vIlel, chaq ghov vay'. pay' mu' «Katrin?» vIQoy. jItlhe''egh, 'ach nuvvetlh vIghovbe'. jIjatlh: «Holtej?» vISamta'. 'ach vIghovbe'taH. tIq jIbDaj 'e' vIQub, 'ach chIp'lu'law'.

HurDaq mayIt 'ej vengDaq maghoS. veng vISovchu'be'mo' ghaHvaD pagh vI'anglaH. chIrgh'a' neH vISov, 'ach wISuch neHbe' ghaH.

DaH Qe' QaQ wISam 'e' wInID, 'ach Ha'DIbaH, nIm joq SopQo'mo' Qatlhqu' Qu'. veng botlhDaq mayIt 'ej tlhoS Daqmaj wISovbe'choH.

tugh 'oy'choH qamDu'maj 'ej loQ bep Holtej. jatlh: «reH yIt DoyIchlan nganpu'. reH Duj wIlo' USA nganpu'.» jIjang: «chaq teH, 'ach motlh jIyItbe' jIH'e'. 'oy' je qamDu'wIj.»

wa'Hu' Qe' QaQDaq Sop ghaH 'e' qaw 'ej Qe'vetlh wI'el. tugh maSopchoH 'ej Soj vItIvqu'.

majatlhchoH 'ej ngeDchoH vIyajmeH Qu'. vImerlu'qu'. tlhIngan Hol jatlhtaHvIS vIyaj, not 'e' vIpIH. vIjangmeH tlhIngan Hol vIlo' 'e' vInID, 'ach jIQapqu'be'mo' motlh DIvI' Hol vIlo'. nuQoyDI' Sumbogh nuvpu', nuyajbe'bej. motlhbe'mo' ghu'vetlh vIparHa'qu'.

maSoppu'DI' mebpa'mey tach wI'el. 'ach tachvetlh vIpar. majatlh wIneH, 'ach pay' bomchoH muchmeH ghomqoq. chuSqu' 'ej bomlaHbe'. SIbI' tachvo' mamej 'ej mebpa'mey vaSDaq maba'. majatlhqa'laH.

qaSpu'DI' ramjep matlheD 'ej juHwIj vIchegh. Dunqu' jajvam 'ej DoyIchlanDaq Suchqa' ghaH 'e' vItulqu'.

'ej DaH lutvam vIghItlhmeH meq yISovchoH: majatlhtaHvIS qaS ghu'vam: jatlh Holtej: «Qo'noS QonoS DalaDlaH, 'ej tlhIngan Hol DayajlaH, vaj lutvam yIghaq!» jIjang: «jIpo'qu'be' 'e' DaSov. lutwIj DalughmoHchugh, vaj vInIDqang.»

See also

External Links

Category: KLI    Latest edit: 06 Apr 2015, by KlingonTeacher    Created: 06 Apr 2015 by KlingonTeacher



ST10
Star Trek: Nemesis is the tenth Star Trek movie. It was made in 2002 ...
Woj
In HolQeD volume 1, number 3, a list of new vocabulary from Marc Okrand ...
PictoralGuideToSuffixes
A Pictoral sic for pictorial Guide to the Verbal Suffixes of tlhIngan ...

Day of the week:
Today is ghInjaj


starred Random Article


  • Search

Other languages:

flag_en.png English
flag_de.png Deutsch
flag_nl.png Create New Topic
flag_fr.png Create New Topic

Visit us on Facebook:

 
The Klingon Wiki - Teaching Klingon to the galaxy

All text is available under the terms of a Creative Commons License.
Star Trek™, Klingon™ and related names are trademarks of CBS Corporation and Paramount Pictures, and are used under "fair use" guidelines.