Qo'noS QonoS - Issue 21, September 2001

See MOVED TO... Qo'noS QonoS for more information.

The following text has been imported from the KLI's homepage and is displayed here for archiving and future reference. No copyright infringement intended.

tagha' qep'a' vIjeSlaH

qonta' 'ISqu'
(written by Agnieszka Solska) (Note: Some words in this text have been replaced by new words we have learned after the text has been published)

pongmey bIH mu'meyvam'e': maHvatlh, Holtej, nI'taQ, Quvar, taj'IH, Volker, veSbe', ghunchu'wI', SI'neyq, 'angghal

USA-Daq qaSpu' Soch qep'a'mey. Do'Ha' jIlengmeH Hopqu' Sepvetlh. wa' ben HolQeD vIlaDtaHvIS, De' Dun vItu': BelgiumDaq qaS qep'a' chorghDIch. jIQuchqu'! qep'a'vam vIjeSlaHbej. tagha' tlhIngan Hol jatlhwI'pu' vIqIHlaH. tlhIngan Hol vIqeqmeH 'eb QaQ vIghaj.

BelgiumDaq jIlengtaHvIS jISeyqu' 'ej jIbItqu'. wej tlhIngan Hol vIjatlhlaH. mu'mey puS neH vISov. mulajqang'a' jatlhwI'pu' po'? 'e' vISovbe' 'ach nuch jIHbe'bej. Hol SuvwI' jIH 'ej batlh qaDmey vIlajrup. qaDna' 'oH qep'a'vam'e'.

taghpa' 'uQ'a' vaSDaq jIjaH. pa' ba' nuvpu' law'. tlhIngan Hol lulo'taHvIS jatlhchuq. tlhIngan Hol QIch vIghov 'ach mu'mey vIyajbe'. jIbItqu'mo' jIbuSlaHbe'. Qam wa' loD 'ej jIHvaD quSDaj qeD. muquvmoHba'. «qatlho'» ghaHvaD jIjatlh. tlhIngan Hol vIlo' 'e' vInID. jeSwI'pu' pongmey vISov vIneH. «naDev pagh vISov» jIjatlh. Hagh wa' nuv. «pagh jIH» jach. «pagh» 'oHbej pongDaj'e'. tlhaQqu' ghu'vam. Do'Ha' vIjangmeH mu'mey tlhaQ vIlo'laHbe'. wej jIpo'.

tugh tachDaq maghoS. HIq vIychorgh joq jablu'taHvIS paw tlhInganpu': loDpu', be'pu', ghu je. DoyIchlan luDab chaH. Dojqu' Hoch. 'IHqu' HIpmeychaj. nuHmey law' qeng Hoch. betleH mach 'uchtaH ghu. wa' jaj SuvwI' qu' mojba'.

Sepmey law'vo' ghoSta' qep'a' jeSwI'pu'. QIt Hoch vIqIH. HaDrupqu' jatlhwI'pu' po'Ha', tuvqu' yejHaD 'utlhpu'. qaStaHvIS qep'a' majatlhchuq 'ej lutmey Daj wIja'. Qujmey pIm wIreHtaHvIS mu'mey Sar DIloy 'e'wInID. mabomqu' je. pIlmoHbogh bommey DIbom 'ej bommey tlhaQ DIbom. tlhIngan bommey law' lutu'lu'. wa' jaj Qe' QaQ wItu'. pa' Soj 'ey jablu'. ro'qegh 'Iwchab rur wa' nay'. qagh rur latlh. chejDu' jatDu' je Sop taj'IH, qurgh wIb vISop jIH. ngal, char 'ej tlher Sojvam. tayba' Brussels 'ach tlhInganpu' leghbe'bejpu' vengvam nganpu'. nuleghDI' merqu'bej. mev Dujmey, mev yItwI'pu'. puqpu' mach DIghIjchoHlaw'.

nuHmeychaj lo'laHbej DoyIchlan tlhInganpu'. betleH vIyanlaHmeH mughojmoH veSbe'. jIlev 'ej jIngol 'e' vInID. Qatlh Qu'vam: tInqu' 'ej 'ugh betleH. chay' meqleH Qachlu'? meqleH pep Volker'ej mIw mu'ang.

jaj Qav, tlhIngan Quch munob DoyIchlan be'pu'. vItuQmeH muboQ. QuchwIj leghDI' ghunchu'wI' jatlh «Quch 'IH Daghaj». jIlegh'egh. lugh ghunchu'wI'. DaH tlhIngan vIrur. ngugh paw SI'neyq. vIleghDI' jImerqu': nIb QuchDaj QuchwIj je. toH, loDnI'wI' ghaHbej! taHjaj qorDu'maj!

tlhIngan Hol yejHaD maH. tlhIngan Hol wIjatlhchu' wIneH. tlhIngan Hol Sovchu' pab pInpu' net Sov, 'ach 'oH qeqchu' Hoch jeSwI'pu', ghu je. wej jatlhlaH, 'ach tlhIngan QIch lo'choHlaw': «'a'», «wa'» je jatlh 'ej «gh» qeqtaH. jIjatlhtaHvIS jIQaghqu'. mu'tlheghmey vIchenmoHmeH mu'ghomwIj vIlo'nIS. jIDo': mu'ghom gherta'bogh munobpu' vaHmatlh. lI'qu' mu'ghomvam: Hoch mu'mey ngaSmo' 'oH naD pIn'a''e'.

tlhIngan Hol Sovchu''a' jatlhwI'? Sov tobmeH Qu' le' 'oghta' Holtej 'utlh. loS patlh ghaj Qu'vam. patlh wa'DIch chavlu'chugh «taghwI'» mojlu', patlh cha'DIch chavlu'chugh «ghojwI'» mojlu', patlh wejDIch chavlu'chugh «po'wI'» mojlu', 'ej patlh loSDIch chavlu'chugh «pab pIn» mojlu' ('ach wej Qu' loSDIch 'oghlu'ta'). patlh wa'DIch vIchav 'e' vInID 'ach jIluj jay'! qaStaHvIS jaj veb jInIDqa' 'ej jIQap. jIQuchqu' 'ej jIlop. DaH taghwI'na' jIH. patlh cha'DIch bajta' juppu'wI' chu': maHvatlh nI'taQ je. Do'Ha' luj Quvar: wa' vatlhvI' neH Hutlh. baQa'!

rInpu' qep'a' chorghDIch. tlheDpa' 'angghal yIH munob. «yIH ghajnIS Poland» jatlh. chaq lugh, chaq qID ghaH. batlh nobvam Huj vIlaj. 'ach juHwIjDaq jIcheghtaHvIS yIH neH vInge'be'. mupIlmoHchu'pu' qep'a'. tlhIngan Hol vIHaDtaH vIneHbej.

yejHaDvo' jabbI'ID

DISvam qaS lot net Sov. tInbogh qachmey potlh HIv nuchpu', 'ej nuv law' HoH. nuv HoHlu'pu'bogh DIqel 'ej qorDu'chaj DIvup tlhIngan Hol yejHaD. HIvDI' qab 'angvIpbogh nuch mataHvIpQo', 'ej chotwI' ngu'lu' 'ej noDchu'lu' 'e' wIHarchu'. chunwI' HoHlu'pu'bogh DIqawtaH 'ej DIquvmoHtaH.

See also

External Links

Category: KLI    Latest edit: 09 Jul 2015, by WikiAdmin    Created: 08 Mar 2015 by KlingonTeacher



Plural
REDIRECT Type2NounSuffixes
CarletonCopeland
Carleton Copeland ( Klingon Name : qa'ral) ist a Klingonist from ...
MUSH
The Klingon Educational Virtual Environment (abbreviated KEVE) is a MUSH ...

Day of the week:
Today is DaSjaj


starred Random Article


  • Search

Other languages:

flag_en.png English
flag_de.png Deutsch
flag_nl.png Create New Topic
flag_fr.png Create New Topic

Visit us on Facebook:

 
The Klingon Wiki - Teaching Klingon to the galaxy

All text is available under the terms of a Creative Commons License.
Star Trek™, Klingon™ and related names are trademarks of CBS Corporation and Paramount Pictures, and are used under "fair use" guidelines.