Qo'noS QonoS - Issue #26, October 2003

See MOVED TO... Qo'noS QonoS for more information.

The following text has been imported from the KLI's homepage and is displayed here for archiving and future reference. No copyright infringement intended.

gho pup

qonta' taD
(written by Tad Stauffer)

qen QoQ much vIghoS. muchqu' QoQ ghom; gho pup 'oH ghom pong'e'. ghomvam DaSovbe'chugh, vIDel: loQ chu' QoQ ghomvam -- tera' DIS 1999 cher'egh. latlh QoQ ghommeyvo' (Smashing Pumpkins, Marilyn Manson, Tool, latlh je) QoQ ghomvam lumuv vagh ghotpu' Sar. HurDaghmey chu'qu' wej ghotpu', 'ej bom wa' ghot, 'ej 'o'lav chu' wa' ghot. vaj ghoqoqvam lupupmoH 'ay'pu'vam. vaQ QoQchaj; meqleH rur.

wa' bommey tlhoQ lIngpu' gho pup. Sea of Names 'oH tlhoQ pong'e'. bommey'e' ngaSbogh Sea of Names wISovbej jIH, latlhpu' je.

latlh bommey tlhoQ lInglI' gho pup. mIw wa'maH wejDIch 'oH tlhoQvam pong'e'. tlhoQvam chu' nummeH gho pup, 'op bommeyvam chu' much je.

PhiladelphiaDaq qaS muchvam. much vIghoSmeH, qep'a' wa'maHDIch mebpa'mey vIjuS 'e' vItu'. mutlhej 'op juppu'wI'. machbej QoQ qach; vaghvatlh bejwI'pu' neH ngaSlaH. vaj jISaHlaHmo' jIDo'qu'. quSmey Hutlh qach. QamnIStaH Hoch.

narghpa' gho pup, much latlh QoQ ghom. lIH ghomvam, 'a ram, 'ej Dogh, 'ej muDuQbe'. gho pup'e' vIloSlI'. tagha' nargh gho pup. tlhuH Hoch bejwI' ('ej tlhIch lutlhuH bejwI' puS). bom wa'DIch bomtaHvIS bomwI', QIbDaj neH leghlu'. 'a taghDI' bom cha'DIch, narghchu' ghaH. namtunDaj bomDI' gho pup, SeychoHba' bejwI'pu'. bom mu'mey bomchoH 'op bejwI'pu'. QorchoH latlhpu' vID. 'ej 'e' vIpIH. Tool much vIghoSpu', 'ej pa' Qorpu' je bejwI'pu'. vaj che'ronHom vIghuH 'ej vIDoHrup.

pIlmoHqu' puj 'ej HoSghajbe', latlh bommeyDaj chu' je. 'a bIH vIghovchu'be'. ngugh jotchoH bejwI'pu', bom mu' Sovbe'mo'.

bomtaHvIS gho pup, chaH 'emDaq nguv wovmoHwI'mey. Do'Ha' Duy'taH wa' wovmoHwI'. SuDmoHbogh mep Hutlhlaw' wovmoHwI'. DoqlaH neH wovmoHwI'vam.

bom HochDIch muchta'DI' 'ej 'o'megh bomta'DI', jIDoy'. chuS QoQpu' 'ej loQ 'oy' teSDu'wIj. 'ach vItIvbej.

latlh De'Hom Datu'meH, http://www.aperfectcircle.com DaSuchlaH.

jInmolwIj chu'

qonta' Holtej
(written by D'Armond Speers)

qen 'orwI'na' vImoj net Sov. puq jIHDI' 'orwI' jIH vIneHqu'. 'orwI' vImojDI' ngoQ potlh vIta'.

'ach nargh qay'bogh ghu'. Duj vIlo'meH waghqu'. jI'ortaHvIS qaSDI' wa' rep, wa'maHvatlh DarSeq vIDIlnIS. ngajnIS lengwIj. meqvammo', lI'qu'be' chaw'wIj. Sumqu'chugh ghochwIj waghbe' 'ej lI'be'; Hopchugh lI', 'ach waghqu'mo' jIjaHlaHbe'. wejpuH.

chay' ghu' vIDubmoH?

chaq muD Duj vIje'laH. Hmm. vIje'chugh, cha'bIp vIDIlnIS. wagh; juH rur. 'ej, qay'taH ghu': Duj laH vuSlu'. cha'vatlh tlho'ren nIn qenglaH Duj; Hoch rep loSmaH tlho'ren natlh. vaj cha'vatlh tlho'ren qengDI' loSvatlh qelI'qam lenglaH. Hopbe'. Hoch rep HutmaH qelI'qam lenglaH; qaSDI' vagh rep (loSvatlh qelI'qam), SaqnIS 'ej nIn SuqnIS.

wa'vatlh javmaH cheb neH qenglaH. pagh DoD jav cheb ngI' wa' tlho'ren nIn. wejmaH loS cheb ngI'chugh Hoch raQpo', 'ej buy'chugh nIn ngaSwI', wa'vatlh HutmaH jav cheb qengnIS. 'Iq cheb.

cha' qelI'qam 'ab 'Iv puvlaHbogh Duj. Colorado vIDab; tIng 'ev ghap jIlengchugh, HuD vIghom. lI'be'.

Do'Ha'. Huch vIHutlhbe'chugh, lI'be' Duj vIje'laHbogh.

nuq vIta'laH? Duj vIngIplaHbe' (wagh); Duj vIje'laHbe' (wagh). Duj chenmoHlI' jupwI'. ngoDvam vISov, 'ach vIlIj. waghmo' Duj jIbepDI', Duj vIchenmoH jIH 'e' chup jup.

loQ Duj motlh vIDel. tlhopDaq 'oH QuQ'e'. botlhDaq 'oH telmey'e'. 'emDaq 'oH telHommey'e'; SaS wa', chong latlh.

Duj chenmoHbogh jupwI' vIDel. 'emDaq 'oH QuQ'e', 'ej Duj yuv. tlhopDaq 'oH telHom chong'e'. 'emDaq 'oH tel'a''e'. canard 'oH Dujvam'e'. Cozy DoD loS 'oH Dujvam pong'e'.

Duj laH vIDel. cha'vatlh cheb ngI'. loS raQpo' qenglaH. cha'vatlh cha'maH loS tlho'ren nIn qenglaH. loSvatlh cheb qenglaH, vaj loS raQpo', Hoch nIn qenglaHbogh je qengDI', puvlaH.

wej DoD cha' qelI'qam 'ab 'Iv puvlaHbogh Cozy; not HuD vIqIp.

Hoch rep cha'maH jav tlho'ren nIn natlh. SaqnISpa' chorghvatlh qelI'qam lenglaH. Hoch rep wa'vatlh chorghmaH vagh qelI'qam lenglaH. nom puv!

ngeDqu' Duj chenmoHmeH mIw. 'ej waghbe'. Doj porgh vIchenmoHmeH, wa'maH cha'SaD DarSeq vIDIlnIS. jItaghpa' Hoch vIje'nISbe'; vIpoQDI' vIje'laH. QuQ vIje'meH ghaytan vaghSaD DarSeq vIDIlnIS. juHwIjDaq Duj vIchenmoHlI'. ghaytan vagh nem jIrIn. vI'orDI', nIn neH vIje'nIS. qutlhqu'.

rejmorgh yIDaQo'. ngaDqu' Dujvam. tlhoS wejvatlh vaghmaH chenmoHlu'. Hegh cha' 'orwI' neH, 'ej potlhbe' Duj. (Cessna 'orchugh, Heghbej.) vI'orlaHpa', chov qum.

taQ California qum

qonta' p'an
(written by p'an)

California qum yajlaH vay' 'e' qIt'a'?

wa' ben law' rewbe'pu' belHa' California qumwI'. chut ngo'mo' qumwI' luwIvHa'laH rewbe', 'ach jav jar loSnIS. DaH qIt. Qatlhbe' mIwvam 'ach CaliforniaDaq qaS. CaliforniaDaq taQ. naDev tagh Disneyland Hollywood je. qatlh motlh qum 'e' pIH vay'? jatlh P.T. Barnum Hoch tup bogh qoH 'ej CaliforniaDaq Dab qoH law'.

Davis qumwI' parqu'bej Issa 'oSwI', 'ej mIpqu' Issa. ghum janmey lIng. ghum janmeyvam DaSov'a'? tlhoy wab lIng 'elDI' nIHwI'. tamchoHQo' bImaw'pa'. ghum janvam rur Issa. tetlhDaq pongmeychaj ghItlh rewbe'pu' 'e' tlhob nuvpu', 'ej nuvpu'vam DIl Issa. HutbIp pong neH poQ chut 'ej wa' vI' Soch'uy' pong boS. tamQo' Issa, ghum jan rur. tagha' 'ol Hoch pong 'ej tugh wuqlaH rewbe'pu'. 'ach Huvqu' mIwvam. wa' 'ovwI' DawIvlaHpa' Davis qumwI' DawIvHa' 'e' DawuqnIS. quq qumwI' qaD. cha' wIv DawuqnIs. mISqu'. Davis qumwI' lujey luneHbe'law' 'op nuvpu'. DaH źghobe'╗ yIwIv jatlh Issa. qatlh? 'ovwI' 'Iq tu'lu'. luj wIvDaj 'e' qIt. cho'meH bID wIvmey chavnISbe' 'ovwI'. wa'maH vagh vatlhI' neH chavnIS wa' nuv. taQ, qar'a'?

CaliforniaDaq 'ovlaH vay'. wejSaD vaghvatlh dollars javmaH pongmey je neH poQ.

wejwen qaDvam lulajlaw' wa'SaD loSvatlh 'ovwI'. HIja', wa'SaD loSvatlh 'ovwI'qoq tu'lu'.

'umbej wa'vatlh wejmaH vagh 'ovwI' neH. Davis qumwI' luwIvHa' 'e' wuqchugh rewbe', ghIq wa' ovwI' neH luwIvnIS. CaliforniaDaq taQ Hoch. 'ovwI'vam 'Iv? cha' DawI' noy (Arnold loD Arnoldqoq puq je) puS noybe'bogh DawI'qoq naHmey pejbogh 'ej mupwI' Qachbogh tojwI' (Gallager Daqaw'a'?) Huch SuqmeH porghchaj 'angbogh cha' be' be' tuQbe'pu' cha' paqmey ru' ngevbogh wa' loD roSHa' paqqoq ghItlhbogh wa' be' mIp Huch nub lajbogh wa' 'ovwI' not Dujmey law' chIjpu' law' loD mIp wejpuH. wa'vatlh wejmaH vagh 'ovwI' tu'lu', 'ach cho' 'e' tullaHbe' HochHom. qen ngachlaw' vagh 'ovwI' Sagh. Dabej'a'? qaDvam vIbej. ngachbe'. SoQmey maq, ghoHchuq, vuDmey ja'chuq . . . 'ach Dach ngoDmey. butlh luHutlh Hoch 'ovwI'. toH, ba', mon. wejpuH. DaH vIparqu'bogh 'ovwI'pu' vIngu'laHbej. pIj monchugh vay' vIvoqbe'.

ngachlaw'pa' 'ovwI'pu' mIw mev bo'DIj 'e' tlhob 'op nuvpu'. jatlh maybe'. wIvlaHbe' rewbe' mIpbe'. Qochbe' bo'DIj 'ej lum mIw. ghIq qel bo'DIj moch 'ej mIw chaw'. Qo'noSDaq DevwI' wIvlaHbe' bo'DIj 'ach tera'Daq mIw SIghlaw' bo'DIj. tugh rIntaH mIw, qumwI' wIvta' rewbe'. mev SoQmey. tam Hoch.

'ach qumwI' chu'mo' belHa'choHDI' vay', jav jar neH loSnIS. ngugh wIvHa'bogh mIw taghqa'laH.

Haghqa'bej veqlargh. Disneyland vIDabbej jay'.

See also

External Links

Category: KLI    Latest edit: 25 Oct 2016, by MarcZankl    Created: 25 Oct 2016 by MarcZankl



KlingonPocketDictionary
The Klingon Pocket Dictionary is a dictionary/search engine on the website ...
Nerd
REDIRECT Festival Of The Spoken Nerd
ManfredStrau▀
Dipl. Ing. Manfred Strau▀ is technical assistant in the study program mikro ...

Day of the week:
Today is povjaj


starred Random Article


  • Search

Other languages:

flag_en.png English
flag_de.png Deutsch
flag_nl.png Create New Topic
flag_fr.png Create New Topic

Visit us on Facebook:

 
The Klingon Wiki - Teaching Klingon to the galaxy

All text is available under the terms of a Creative Commons License.
Star Trek™, Klingon™ and related names are trademarks of CBS Corporation and Paramount Pictures, and are used under "fair use" guidelines.