Qo'noS QonoS - Issue 31, April 2004

See MOVED TO... Qo'noS QonoS for more information.

The following text has been imported from the KLI's homepage and is displayed here for archiving and future reference. No copyright infringement intended.

qen vIHotlhlu'

qonta' Holtej
(written by d'Armond Speers)

Dajqu' tlhIngan Hol jatlhwI' 'e' tu'law' De' ja'wI'. qaStaHvIS wa'maH DIS, qaSDI' qep'a', Hoch DIS SaH De' ja'wI', nuyu'meH. teH, roD nuvaq. 'a jISaHbe'; numuchmo', tlhIngan Hol jatlhwI' chu' wISamchugh, Qap.

puqloDwI'vaD tlhIngan Hol vIghojmoHmo', muyu' neHqu' De' ja'wI'. ghu'vam vIlajchoH. DISben puS muyu' Huj paqHom De' ja'wI'. ghItlhvammo' muyu' neH Howard Stern. Stern DaSovchugh, muvaqqu'mo' bIyay'be'. mu'tlheghvam vImugh 'e' poQ Stern: The rain in Spain falls mainly on the plain. 'op mu'vam Hutlh tlhIngan Hol 'e' vIQIjchoH, 'a SIbI' mubuSHa'choH Stern. wejpuH. 'a jISaHbe'.

jar puS wen murI' 'e' nID Crank Yankers. pInwI' ngo' lurI', 'ach pa' jIvumtaHbe'mo' jISaHbe' 'ej muSambe'. 'a pongwIj lulo'mo' 'ej qabwIj lu'oSmo', lo'vam vIchaw' 'e' mutlhob. vIghIb. Hol HaDnIS Ray Shanty 'oH chovnatlh pong'e'. tlhIngan Hol jatlhwI' nej, 'ach SamlaHbe' Ray. latlh vumwI' Sam. Bill Evans 'oH pongDaj'e', 'ach nom jatlhmo', Blevins jatlhlaw'. puQDI' Bill, ghogh HablI' chu'Ha'. ghIq peghDaj 'ang: roDajvo' jeq tlhInganHom (jIH), 'ej qejqu'mo' Blevins, qun. Total Recall Daqawchugh, Kuato vIrur 'e' Datlhoj. tlhaQ.

chovnatlhvam bejlaw' latlh De' ja'wI', murI'mo'. TechTV_vaD mumuch luneH. _Unscrewed with Martin Sargent 'oH pongDaj'e'. murI'DI' tlhIngan DawI' nej (mIv je DaS tuQqangbogh vay'). Qo' jIjatlhba'. lutwIj vIQIj. (tlhIngan Hol vIchenmoHbe' jIH 'e' vIQIjnISchu'; ghaytan mISpu'.) lutwIj luqel, 'ej murI'qa'. mebchaj vImoj luneHbej.

San Francisco vIleng 'e' luDIl. meb pa'mey vIghoS. ram ta luchenmoHmo', 'uQ vISoppu'DI' paw ta pa'Daq muqengbogh Duj. not ta pa' vIghoS; jIHvaD chu' wanI'vam. le'be' pa'. bejwI'pu'vaD quS puS tu'lu'; chaq wa'maH vagh quS. "pa' SuD" vIpIH, 'ach tu'lu'be'; chovnatlhwIj vIloStaHvIS, bejwI'pu' 'ay' retlhDaq jIHvaD quS tu'lu' neH. ta wIqonpa' Martin Laura je vIqIH. taghDI' chovnatlh, tlhIngan Hol jatlh neH Laura, 'ach tlhIngan QIch jatlhmeH, jeQbe'qu'. vIQaH. «'u'Daq Holvam potlh law' Hoch Hol potlh puS, Hov leng ngotlhwI' SoHchugh» jatlh neH, 'ach Qatlhqu' 'ej nI'qu'. loQ nIngajmoH: «potlhqu' Holvam, Hov leng bejwI'vaD». wIqIHpa' not tlhIngan Hol QIch jatlh Laura, 'a jatlhDI' jIyon. ta wIqonpa' loQ muyu' Martin je. runHa' ghaH. cha' paq vIqem: tlhIngan Hol mu'ghom, Hamlet je. ghaHvaD paqmey vI'agh. Quchlaw'; Hamletvo' SoQHom qawlaw'.

taghDI' chovnatlhwIj, HotlhwI' tlhopDaq quSDaq jIba'. ngo'qu' quSvam; Dejruplaw'. SIbI' HotlhwI' chu'lu'pa', tI'choH vay'. Hagh Martin jIH je. chu'DI' HotlhwI', HaghlI' Martin.

ngugh muyu' Martin Laura je. Dochbe'qu' chaH; tlhIngan Hol mung vIQIj. loQ puqloDwI' vIDel (tlhIngan Hol jatlhtaHvIS puqloDwI'). pIm tlhIngan Hol jatlhwI', tlhIngan Hol DawI' 'e' vIQIj. mu'tlhegh puS vImugh 'e' tlhob Martin. I'm a nerd 'oH mu'tlhegh wa'DIch'e'. ben puS, muyu'DI' Howard Stern, mu'mey wIHutlh 'e' vIQIjchoHDI', mubuSHa'choH. jImugh 'e' tlhobDI' Martin, ghu'vetlh vIqawchu', 'ej qaSqa' vIneHbe'. vay' vIjatlhnIS. loQ jIQub, 'ej jIjatlh «chamwI' jIH». pupbe', 'ach yap.

rInchoHDI' ta 'ay'wIj, 'ay' veb vIlIH 'e' tlhob Martin. vIlIHmeH Servin' up a hot dish of Girls Gone Wired vImughnIS. ghuy'cha'. ben puS tlhIngan Hol Del Wired paqHom; tlhIngan Hol yejHaD luyu'. paqHom pong mughnIS, 'ej mu' «Huj» lo'pu'. wanI'vam vIqaw 'ej mu'vetlh vIlo'qa'. mu'tlheghvammo' vImughbogh jIHembe', 'ach Qu' vIlajnIS. «nay'Daq be' Huj vIjab» jIjatlh.

wanI'vetlh vItIvqu', 'ej vItlhoblu'chugh vIruchqangqa'bej.

See also

External Links

Category: KLI    Latest edit: 10 Aug 2015, by KlingonTeacher    Created: 10 Aug 2015 by KlingonTeacher



NewWordsQepa18
From Alan Anderson{{Message from Alan Anderson to the mailing list ...
CurseWarfare
Curse warfare (in Klingon: mu'qaD veS) is a game of cursing between ...
Kronos
Kronos is the name of the Klingon homeworld. In Klingon it is spelled ...

Day of the week:
Today is jaj wa'


starred Random Article


  • Search

Other languages:

flag_en.png English
flag_de.png Deutsch
flag_nl.png Create New Topic
flag_fr.png Create New Topic

Visit us on Facebook:

 
The Klingon Wiki - Teaching Klingon to the galaxy

All text is available under the terms of a Creative Commons License.
Star Trek™, Klingon™ and related names are trademarks of CBS Corporation and Paramount Pictures, and are used under "fair use" guidelines.