Qo'noS QonoS - Issue 34, July 2004

See MOVED TO... Qo'noS QonoS for more information.

The following text has been imported from the KLI's homepage and is displayed here for archiving and future reference. No copyright infringement intended.

Star Trek: The Experience - wanI' chu' vItu'

qonta' p'an
(written by p'an)
qen Las VegasDaq qaS QelHom qep'a'. Star Trek: The Experience vISuchqa' vIneH. tagha' 'eb vIjonlaH 'ej wanI' chu' vItu'. tlhIngan may' 'oH wanI' wa'DIch'e'. Borgngan may' 'oH wanI' chu''e'.

bItaghmo' pa' tIq Da'elnIS. lengmeyHey nung mem pa'. mem pa'Daq Hov leng Dochmey choqlu'. jenqu' rav'eq. DunglIjDaq puvlaw' DujmeyHey tIn. tlhoS 8.75 'uj 'aD 'entepray' A 'ej tlhoS 10.5 'uj 'aD 'entepray' D. tlhoS 9 'uj 'aD Voyager toQDuj je. Dojqu' DujmeyHeyvam. tlhoy' retlhDaq SIH bIyItbogh He. tlhoy' nIHDaq Dochmey ngo' 'agh. tlhIngan Sutmey vulqangan Sutmey je tu'lu'. betleH bey' tu'lu' 'ej tlhIngan tajmey Sar 'agh je. tlhIngan nISwI'mey Hoqra'mey je 'agh. 'agh tlhIngan HoD quS 'ej 'Iw HIq qegh tu'lu'. DIvI' HIpmey qawHaqHommey je tu'lu'. tlhoy'Hom poSDaq Hastamey naghqoq beQmey je lutu'lu'. DIvI' qun DIvI' wanI'mey je cha'. wanI' tetlh cha' naghqoq beQmeyvam. qen Archer HoD wanI' chellu'. 'op tlhIngan qun tu'lu'. tlhInganpu' noy tu'lu' je. Hastamey Doch ngo' je DanuDlaH. ngugh nIvuQbej 'ach chob bIveghtaHvIS bImoDnISbe'. cha'logh pa'vam DaveghnIS. Hoch DanuDlaHbej.

Star Trek: Experience DaSuchbe'chugh, nom lengHey vIQIj. qa'rI'Daq cha' lojmIt tu'lu'. lengqoq wa'DIch 'oH tlhIngan may''e'. lojmIt bI'el. pay' wanI'Hey QIjtaHvIS cha' beq Daquchlu'. 'entepray'Daq bIyaH. jolpa' Dapaw. (qaStaHvIS qep'a' javDIch jollaw' qep'a' jeSwI'. mIv je DaS tuQ jeSwI'vam. leghDI' DIvI' beqpu' yay'qu' 'ej jatlhlaHbe'. tlhaQqu'.) ghIq 'entepray' meQ DaSuch. pay' 'entepray' HIvqa' tlhInganpu'. nom chobmey bIveghnIS ghIq lupDujHomDaq bInargh. lupDujHomlIj HIv tlhInganpu'. lupDujHomlIj tlha' toQDujmey. DIng lupDujHom 'ej nom toQDuj bIngDaq Dachol. tlhoS paw'chuq Dujmey. Seyqu'.

rInDI' lengqoq'e' mem pa' DacheghnIS. DIvI' qun DanuDqa'laH. qa'rI'Daq DajaH. latlh lojmIt DapawDI' Borg wanI' Datu'. bI'elDI', DIvI' tengchaHDaq Dajollu'. Qulpa' tIn 'oH. naDev Borg ghobtaH DIvI' 'ej Hubmey QullI' tej. 'elDI' Hoch nuv Hotlhlu'. yoqpu' muvmoHmeH nejwI'mey machqu' lo' Borg 'ach nejwI'meyvetlh 'omlaw' 'op Humanpu'. Humanpu'vam Qul Voyager Qel. Borg nejwI'mey machqu' Da'omlaH 'e' pIH. motlh nguqqu' Voyager Qel 'ach bIle'qu'mo' lIH'egh. jInmolDaj QIjtaHvIS, tengchaH HIv Borg. nItoD tengchaH beq 'e' lunID. nom chobmey DaveghnIS. Borgnan Suv beqpu' law' 'ej chobmey bIveghtaHvIS QIH DaleghlaHchu'. DIvI' beq jeylu' 'e' Dabej. Borg janmey mojchoH DIvI' De'wI'mey. bImoDnIS. yaHtaH beqpu'. mIqta' De'wI' je Qaw' Borg 'ej DInDaq nItlha'. latlh chobmey DanuDchugh, vaylI' 'ej tlhaSlI' ghot 'e' DaleghlaH. Do'Ha' Hoch may' luj DIvI' beqpu' 'ej HIv nejwI'mey machqu'. Borgnganpu' mojchoH DIvI' beqpu' 'e' DabejlaH.

tengchaHDaq lulIgh Datu'laHbe', vaj lupDujHom bI'elnIS. bInarghtaHvIs, lupDujHomlIj jon Borg Duj. lupDujHom bI'elpa', safety glasses DatuQnISmoH. jaS DuleghmoH safety glasses. DaH wej lurghmeyDaq qaSchu' may'. Borg Duj qoDDaq 'elmoH 'ej chol Borg mIqta'mey. pay' tlhoplIjDaq nargh Borg jo'mey 'ej 'emlIjDaq puv. qablIj tlhopDaq mev mIqta'vam. SoH'e' nIbuS. nIHotlaw'. qablIj DuHot SuS. pay' HeD mIqta'mey. tagha' Borg joH'a' DaqIH.

tlhoplIjDaq ghIr Borg joH'a'. nachDaj, volchaHpu'Daj je pIpDaj je neH ghaH. DabejtaHvIS ghaH ghoS mIqta' 'ej porghDaj chenmoH janvam. nargh roDaj ghIq DeSDu 'uSDu' je rar jan. tagha' porghDajDaq rar nachDaj. tlhoplIjDaq Qam Borg joH'a'. mInDu'lIj buS 'ej mIgh qabDaj. Borgngan Damojbej 'e' buQ. pay' nImerqu'. pIplIjDaq Sa'HutlIjDaq je HIvchoH nejwI'mey. motlh jach vay'. Borg yIn mojlaw' yInlIj 'e' 'ang Borg joH'a'. Borg chob Davegh. Borgngan Darur 'ej Borgngan mInDu' Dalo'law'. Borg Hastamey Borgnganpu' je DaleghlaH. teSDu'lIjDaq tlhup ghoghmey law'. mon Borg joH'a'. bInajbe'law'. Borgngan bImojbej 'e' nIpon.

Borgngan jIHbe'mo' vItoDlu'ba'. DuSeymoHbej toD may' 'ach pegh vI'angQo'. Las Vegas DaSuchchugh, Star Trek: Experience DaSuchnIS. ngugh nIHot Borgnganpu'. Borg joH'a' DaqIH je. SoHvaD mon Borg joH'a'. toH, chaq Borgngan jIH... qep'a'Daq qalegh. (jImon).

See also

External Links

Category: KLI    Latest edit: 11 Apr 2017, by MarcZankl    Created: 10 Aug 2015 by KlingonTeacher



PopCultureHeroCoalition
On 30 November 2016 , Star Trek actor Chase Masterson posted an ...
VerbOfSpeech
A verb of speech is a verb that describes something that is spoken ...
Weather
After receiving lots of new words relating the weather at qep'a' in 2017 ...

Day of the week:
Today is ghItlhjaj


starred Random Article


  • Search

Other languages:

flag_en.png English
flag_de.png Deutsch
flag_nl.png Create New Topic
flag_fr.png Create New Topic

Visit us on Facebook:

 
The Klingon Wiki - Teaching Klingon to the galaxy

All text is available under the terms of a Creative Commons License.
Star Trek™, Klingon™ and related names are trademarks of CBS Corporation and Paramount Pictures, and are used under "fair use" guidelines.